Os avisos serven para dar a coñecer os comunicados de carácter urxente, licitacións abertas, rúas cortadas ao tráfico e desvíos alternativos.



SEGURIDADE CIDADÁ

Incidencias Policía Local

SERVIZOS PRESTADOS POLA POLICÍA LOCAL

Dende as 08:00 horas do día 22/06/2022 ata as 08:00 horas do día 23/06/2022


--:-- LOCALIZACIÓNS PERMANENTES: de tres persoas.
--:-- REQUISITORIA, DETENCIÓN E PERSONACIÓN: localízase unha persoa cunha requisitoria de detención e presentación dun xulgado da Coruña. Trasládase a dependencias de CNP.
09:15 VEHÍCULO INCENDIADO: en Montero Ríos con Rapa da Folla comezou a arder un vehículo. É necesaria a intervención de bombeiros para apagar as lapas.
11:25 ACCIDENTE DE TRÁFICO: na confluencia das rúas Hospitaliño/San Roque, onde un vehículo, ao realizar manobra de marcha atrás, golpea un peón que resulta ferido de carácter leve.
11:30 ACCIDENTE DE TRÁFICO: na vía La Cierva, entre dous vehículos, con resultado de danos materiais.
15:30 DANOS EN VEHÍCULO: recíbese chamada que indica que na rúa Escultor Camilo Otero un vehículo causa danos a outro. Inícianse pescudas.
15:30 CAMIÓN AVARIADO: préstase servizo na SC-20 nas proximidades do Polígono do Tambre pola avaría dun camión.
21:55 ACCIDENTE DE TRÁFICO: avísase a bombeiros por accidente no acceso da AP-9 dende a rotonda e a rúa Santa Lucía. Atópase implicado un vehículo cuxo condutor presenta signos de intoxicación etílica. Faise cargo do accidente a Garda Civil.
23:20 DELITO CONTRA A SEGURIDADE VIARIA E DETENCIÓN: instrúense dilixencias por perda de vixencia do permiso de condución ao condutor dun vehículo.
--:-- OURIÑOS: 1 proposta de sanción.
00:40 PROBA DE ALCOHOLEMIA: na intersección de Xeneral Pardiñas con Montero Ríos faise proba de alcohol ao condutor dun vehículo, con resultado negativo.
--:-- RUÍDOS: acódese a un piso.
01:50 MANCHA DE ACEITE: Na rúa Cruceiro do Galo con Pombal obsérvase unha mancha de aceite. Acoden os bombeiros para a limpeza da vía.

MOBILIDADE

Corte de tráfico no barrio de San Pedro por mor das festas patronais (24, 25 e 26 de xuño)

Por mor das festas patronais do barrio de San Pedro, pecharanse ao tráfico rodado as rúas de San Pedro e de Concheiros dende as 19.00 h do venres 24 ata as 03.00 h da madrugada do sábado 25, debido á celebración de pasarrúas e actuacións musicais.

Volveranse pechar as devanditas rúas dende as 10.30 h da mañá do sábado 25 ata as 03.00 h do domingo 26 para a celebración das diferentes actividades de convivencia e dinamización comercial nas rúas de San Pedro, Concheiros e nas prazas de San Pedro e Cruz de San Pedro. Durante o tempo que duren os cortes, restrinxirase o estacionamento entre os números 89 e 119 da rúa de San Pedro.

Os desvíos estarán debidamente sinalizados. O Concello de Santiago prega á cidadanía que desculpe as molestias que estas alteracións lles poidan ocasionar.

MOBILIDADE

Cortes de tráfico por mor da celebración das cacharelas de San Xoán

Por mor da celebración das cacharelas de San Xoán, levaranse a cabo os seguintes cortes de tráfico (permitirase o paso tanto aos vehículos de emerxencia como aos residentes):

CORTE RÚA FERNANDO III O SANTO

Pecharase ao tráfico a partir das 18:00 horas e ata o remate da festa, a rúa Fernando III o Santo na súa confluencia coa rúa República Arxentina. O acceso ao aparcadoiro realizarase pola rúa da Rosa.

CORTE RÚA DE SAR

Pecharase á circulación desde as 15:00 horas do xoves 23 ata as 04:00 horas do día 24 a rúa de Sar á altura do número 74, e a Ponte de Sar dende a intersección coa rúa de Diego Bernal.

CORTE PELAMIOS

Cortaranse ao tráfico desde as 15:30 h os cruzamentos das rúas Morón-Castiñeiros-Pelamios e de Burgo das Nacións-Carvalho Calero.

CORTE RÚA DE SAN PEDRO

Pecharase ao tráfico a praza do Cruceiro de San Pedro a partir das 18:00 horas, aínda que se permitirá o acceso á rúa Lagartos pola parte posterior da praza. A partir das 20:00 h pecharase a intersección da rúa Porta do Camiño coa rúa San Pedro.

CORTE ENTRE ALGALIA DE ARRIBA E PRAZA SAN MIGUEL

Cortarase a circulación entre as 20:00 horas do xoves e as 02:00 h do venres no tramo que vai entre a Algalia de Arriba e a Praza de San Miguel. O acceso dos residentes realizarase pola Porta da Pena e a saída, pola rúa da Atalaia.

CORTE EN CONXO

Pecharanse ao tráfico as rúas Campo de Conxo e Sánchez Freire a partir das 20:00 horas e ata o remate da festa

Transporte público

Por mor destes cortes, algunhas liñas do transporte urbano terán que desviarse nalgúns dos seus servizos:

*Corte nas rúas de Sar e Ponte de Sar (afecta á liña 7):

Os servizos da liña 7 a partir das 15:00 h desviaranse por Diego Bernal, multiusos, Fontiñas e avda. de Lugo, retomando o seu itinerario na rúa Curros Enríquez.

Quedarán suprimidas as paradas:
-Sentido Aríns e Fornás: 462, Curros Enríquez, cruce Castrón Douro; 516, Sar de Afora nº 90; 194, Colexiata de Sar; 387, Ponte de Sar nº 22.
-Sentido Valle Inclán: 388, Ponte de Sar nº 41; 195, Colexiata de Sar; 515, Sar de Afora nº 18; 227, Curros Enríquez nº 25.

*Corte en Conxo, nas rúas Sánchez Freire e Campo de Conxo, (afecta ás liñas 5, C2 e C4):

Debido a este corte, as liñas 5, C2 e C4 realizarán os seguintes desvíos:
-Liña 5 sentido Rocha: despois de García Prieto, desviaranse pola avda. de Ferrol, SC-20 ata a rotonda de Volta do Castro, continuando o percorrido habitual por Poza Real de Abaixo (Sta. Apolonia).
Paradas suprimidas: (575) Sánchez Freire; (155) Campo de Conxo, psiquiátrico; (127) Benéfica de Conxo, Televés; (626) Torrente, cruce Travesa Benéfica; (628) Torrente nº 28.
-Liña 5 sentido Vite: realizarán o percorrido habitual ata a rotonda de Televés, onde realizarán cambio de sentido voltando por Torrente, rotonda de Volta do Castro, SC-20, e itinerario habitual pola avda. de Ferrol.
Parada suprimida: (412) Campo de Conxo, psiquiátrico.
-Liña C2: despois de García Prieto, desviarase pola avda. de Ferrol ata a rotonda de Conxo e accederá ao hospital Provincial. Á saída do hospital, terá que ir pola SC-20 ata a rotonda de Volta do Castro, continuando por Torrente, Benéfica, cambio de sentido na rotonda de Televés e retomando o itinerario habitual na rúa dos Roláns.
Paradas suprimidas: (575) Sánchez Freire; (155) Campo de Conxo, psiquiátrico.
-Liña C4: realizarán o percorrido habitual ata a rotonda de Televés, onde farán o cambio de sentido voltando por Torrente, rotonda de Volta do Castro, SC-20, e itinerario habitual por Ramón Baltar cara o hospital Provincial.
Parada suprimida: (412) Campo de Conxo, psiquiátrico.

Solicitudes

Este San Xoán celebraranse 30 cacharelas de carácter público e arredor dunhas 700 en terreos privados.

O Concello de Santiago prega á cidadanía que desculpe as molestias que estas alteracións lles poidan ocasionar.

MOBILIDADE

Servizos de reforzo na liña C11 para o domingo 26 de xuño

A liña C11 verase reforzada este domingo 26 de xuño en horario de mañá, con pasos cada 15-20 minutos entre as 10:00 e as 15:30.

As restantes liñas do transporte urbano terán o horario habitual de domingos e festivos.

MOBILIDADE

Corte de tráfico na ruela das Chufas (22 de xuño) e no Pexigo de Abaixo (23 de xuño)

Mañá mércores 22 de xuño, dende as 8.00 ata as 20.00 h, a ruela das Chufas quedará pechada ao tráfico á altura do número 12 por mor da realización dunha acometida eléctrica.

A rúa das Chufas é a que da acceso á rúa do Campo do Forno, polo que para entrar e saír a esta rúa, no horario marcado, deberá facerse dende a rúa de San Pedro.

Mañá, mércores 22 de xuño, dende as 8.00 ata as 20.00 h, a ruela das Chufas quedará pechada ao tráfico á altura do número 12 por mor da realización dunha acometida eléctrica.

A rúa das Chufas é a que da acceso á rúa do Campo do Forno, polo que para entrar e saír a esta rúa, no horario marcado, deberá facerse dende a rúa de San Pedro.

Pexigo de Abaixo
O xoves 23 de xuño a rúa do Pexigo de Abaixo, á altura do número 22, vai quedar cortada ao tráfico dende as 8.00 ata as 20.00 horas por mor dunha acometida de pluviais de Viaqua. Os vehículos que queiran entrar ou saír dos garaxes situados no tramo afectado poderán facelo dende a rúa da Virxe da Cerca.

O Concello de Santiago prega á cidadanía que desculpe as molestias que estas alteracións lles poidan ocasionar.

MOBILIDADE

Corte de tráfico na rúa da República Arxentina (18 de xuño)

O vindeiro sábado, 18 de xuño, a rúa da República Arxentina vai quedar cortada ao tráfico en horario de 08:00 a 20:00 horas por mor da instalación na vía pública dun guindastre para a realización dunha obra de carácter particular.

O Concello de Santiago prega á cidadanía que desculpe as molestias que estas alteracións lles poidan ocasionar.

MOBILIDADE

Servizos de transporte para o concerto de Marc Anthony no Monte do Gozo (domingo, 19 de xuño)

Con motivo do concerto de Marc Anthony o vindeiro domingo 19 de xuño no Monte do Gozo, ofrecerase un servizo lanzadeira desde a Estación Intermodal a partir das 17:30 h.

Ao remate do concerto manterase este servizo lanzadeira ata ás 03:00 desde a avenida Fernando Casas Novoa (na confluencia coa SC-20) con destino á estación de autobuses.

Ademais reforzaranse os servizo das liñas 6A e 7 para acceder ao Monte do Gozo.

Podes consultar todo a información sobre as paradas e os horarios no documento adxunto.

MOBILIDADE

Restricións circulatorias e servizos de transporte urbano por mor da celebración do festival "O Son do Camiño"

Con motivo da celebración do festival O Son do Camiño, que terá lugar no Monte do Gozo o xoves 16, venres 17 e o sábado 18 de xuño, produciranse as seguintes modificacións no tráfico:

- Pecharase á circulación a rúa das Estrelas (dende a rotonda coa rúa de Fernando Casas Novoa), a rúa do Gozo e a rúa da Agra dos Campos dende as 14:00 horas do xoves 16 ata as 5:00 horas do domingo día 19 de xuño, excepto para vehículos de emerxencia.
- Os/as residentes, que deberán estar acreditados pola organización, poderán acceder pola rúa Agra dos Campos, ou pola zona de Aríns.
- Os vehículos de persoas con mobilidade reducida que asistan aos concertos accederán pola rúa do Gozo.
- En función da densidade do tráfico, principalmente na hora de remate dos concertos, poderán sufrir cortes puntuais as rúas de Senande e de San Marcos. Nesta franxa horaria tamén poderá pecharse ao tráfico a N-634, tendo os condutores que utilizar a autovía A-54 (autovía do aeroporto).

Recoméndase na medida do posible empregar o transporte público, reforzado por dous servizos lanzadeira, e evitar o uso do turismo privado. Para facilitar o estacionamento do mesmo reservarase o aparcadoiro do Estadio de San Lázaro e do Mercado de Amio para asistentes ao evento.

Transporte urbano
Lembramos que se habilitarán dous servizos lanzadeira, un dende o centro da cidade e outro dende o recinto feiral de Amio, que funcionarán durante os días 16, 17 e 18 de xuño de forma continuada ata o acceso ao Monte do Gozo. O servizo arrincará ás 12:30 o xoves e ás 14:00 horas o venres e o sábado, e finalizará ás 5:00 horas da madrugada os tres días do evento. A partir das 23:00 horas, as lanzadeiras realizarán exclusivamente viaxes de volta dende os puntos de saída próximos ao monte do Gozo ata o centro da cidade e ata o recinto feiral de Amio.

A liña especial 1 terá como punto de saída a estación de autobuses, nas dársenas da 21 á 25. O punto de saída dos servizos de volta a partir das 22:30 horas (xoves e venres) e das 22:00 horas (sábado) será a avenida de Fernando Casas Novoa, confluencia coa SC-20.

A liña especial 2 terá como punto de saída o acceso ao recinto feiral de Amio. O punto de saída dos servizos de volta a partir das 22:30 horas (xoves e venres) e das 22:00 horas (sábado) será a rúa de San Lázaro, confluencia coa rúa de Miguel Ferro Caaveiro.

Haberá unha liña espacial adicional para campistas, que realizará servizos desde o aparcadoiro da Cidade da Cultura (con saídas da zona de dársenas de autobuses) e o aparcadoiro do multiusos Fontes do Sar (parada do transporte urbano fronte á entrada ao edificio). Estes autobuses chegarán ata a zona de camping do Monte do Gozo, no cruce de Senande e rúa das Estrelas.

Os servizos de ida desta liña serán exclusivamente o xoves 16 de 11:00 a 18:00 horas, e os de volta serán o domingo 19 de 10:00 a 16:00 horas.

Ademais, os/as asistentes aos concertos dispoñen doutras dúas liñas do transporte urbano, a 6 e a 7, para achegarse ata o Monte do Gozo:

A liña 6 (Os Tilos – San Marcos) realiza paradas nas inmediacións do complexo do Monte do Gozo (zona Costa de San Marcos e Hotel Santiago Apóstol). Nesta liña, as frecuencias serán de 20 minutos o xoves e o venres, e de 30 minutos o sábado pola tarde. As paradas máis céntricas para o acceso á liña 6 son: (691) rúa do Hórreo (estación de ferrocarril), (276) rúa do Hórreo (Parlamento), (277) rúa do Hórreo nº 23, (228) rúa da Ensinanza e (662) rúa da Virxe da Cerca nº 10. A parada máis próxima ao estadio de San Lázaro para acceder a esta liña é a 562, rúa de San Lázaro nº 82.

A liña 7 (Valle-Inclán – Aríns), conta tamén con paradas nas inmediacións do complexo do Monte do Gozo (cruce rúas Senande con San Martiño) nos servizos con destino Aríns. Terá unha frecuencia de 60 minutos todos os días do festival. As paradas máis céntricas para acceder á liña 7 son: (637) rúa de Valle-Inclán (dársena de autobuses), (660) rúa de Virxe da Cerca (Praza de Abastos), (247) rúa de Fonte de Santo Antonio nº 3 e (410) praza de Galicia nº 3.

Plataforma Kiss&Go

A pesar de desaconsellar a utilización do vehículo particular, conscientes de que se achegarán persoas a deixar ou recoller aos asistentes ao evento (sobre todo aos menores de idade), habilitarase a rúa Paulo Coelho para una parada breve. Accederase á mesma a través da N-634, e a saída será a través da travesía de San Marcos – enlace coa N-634 – xiro obrigatorio á dereita – despois de 600 metros, xiro á esquerda a través da rúa Castro – acceso á autoestrada A-54.

Parada de taxis

A parada de taxis recomendada será a xa habilitada na rúa Miguel Ferro Caaveiro (lateral do Pazo de congresos e exposicións de Galicia).

O Concello de Santiago de Compostela prega á cidadanía atenda as indicacións da Policía Local e desculpe as molestias que estas alteracións no tráfico lles poidan ocasionar.

MEDIO AMBIENTE

Reforzo no servizo de recollida do lixo no casco histórico do 15 de xuño ao 15 de setembro

Como consecuencia do incremento da actividade comercial e hostaleira na tempada de verán no casco histórico, e co obxectivo de mellorar a limpeza e ornato das rúas, o Concello de Santiago reforza este servizo, establecendo unha dobre recollida do lixo dende o 15 de xuño ao 15 de setembro.

Así, os residuos deberán sacarse á rúa en bolsas pechadas e introducirse dentro dos contedores, co seguinte horario:

1.- Vivendas particulares e comercios (agás hostalería): a partir das 20:30 horas.
2.- Locais de hostalería: a partir das 02:00 horas.

O Concello de Santiago agradece a colaboración no cumprimento da norma e o do horario, sen a cal esta dobre recollida non obtería os resultados para os que foi deseñada.

Relación de rúas e prazas con dobre recollida:

San Francisco, Obradoiro, Fonseca, Praterías, Conga, Xelmírez, rúa Nova, Toural, Bautizados, Franco, Raíña, rúa do Vilar, Rodrigo de Padrón, San Clemente, Trindade, Hortas, Pombal e Carretas.

MOBILIDADE

Ampliación dos servizos de transporte urbano ao aeroporto

Desde o pasado 8 de xuño, o servizo de transporte urbano ao aeroporto incrementou en 3 as súas frecuencias diarias, dando cobertura deste xeito ás últimas chegadas de viaxeiros á terminal aeroportuaria. Así, o servizo complétase con estas novas saídas:

Saídas do Aeroporto cara a rúa do Hórreo (est. Intermodal): 23:30, 00:00 e 00:20


Compartir: