Saúda do alcalde


Son Martiño Noriega Sánchez. Teño 41 anos e son pai dunha cativa de dous. Son médico por vocación e profesión, e alcalde de Santiago de Compostela desde xuño de 2015.

Esta é a cidade na que me criei durante a miña primeira infancia, é a cidade na que estudei, é a cidade referente nas máis importantes vivencias da miña vida. Por iso, ter a responsabilidade de estar á fronte do Concello de Santiago é unha honra que asumo co compromiso de gobernar para a maioría social, para a xente do común. Eu e o meu grupo de goberno chegamos ao Pazo de Raxoi coa encomenda de procurar solucións para os problemas do día a día da veciñanza. Co obxectivo de defender os intereses da cidadanía, e de facelo dun xeito diferente, máis transparente, máis participado e nun Concello aberto.

Intencións que asumimos sendo moi conscientes de que Compostela é unha cidade singular e especial. Santiago é a capital do noso país, de Galiza, por tanto ten o deber de exercer a lideranza, de ser un lugar de encontro, de diálogo e de acollida. Unha capital cunha historia que compre sempre ter presente para conseguir gañar entre todas e todos o futuro.

Convídote a coñecer máis de Santiago, da súa administración, e do traballo que desenvolvemos no Pazo de Raxoi a través desta páxina web. Convídote a utilizala para facernos as túas achegas, e para lanzar as túas reivindicacións. Este ten que ser un instrumento máis para conseguir un Concello que sexa a casa de todos e de todas.

A Compostela que queremos máis.

Martiño Noriega Sánchez
Alcalde de Santiago de Compostela


Compartir: