NORMALIZACIÓN LINGÜÍSTICA

O Concurso de Cartas de Nadal anima os nenos e nenas a utilizar o galego e a indagar nas tradicións destas datas

02/12/2014 A concelleira de Normalización Lingüística, María Corral, presentou o Concurso de Cartas de Nadal 2014, unha proposta dirixida ás escolas e ás familias para que os nenos e nenas enchan de contidos as súas solicitudes de agasallos. Será unha boa maneira de que os pequenos practiquen destrezas como a escrita ou o debuxo, pero tamén para investigar, reflexionar e comprometerse.

A carta dirixida aos nenos e nenas, escrita polo alcalde, informa de que se recibiu a visita dun embaixador dos personaxes do Nadal, Xián, o Xestor Intergaláctico de Agasallos do Nadal, e que no seu nome lles pide que pescuden, falando coas persoas maiores da súa contorna, sobre as tradicións que poidan lembrar con motivo destas datas –pero non exclusivamente- e que recollan algunha mostra deste acervo na carta que escriban.

A proposta deixa abertas todas as posibilidades para que, en cada caso, a carta dos nenos/as estea dirixida aos personaxes que se prefiran. Con esta proposta inténtase invitar a un contacto máis demorado entre cativos e persoas maiores no que, ademais de utilizar a lingua galega, se transmita e actualice o rico patrimonio inmaterial da nosa cultura: cantos de Reis, ditos, lendas, panxoliñas, xogos, costumes, gastronomía...

As cartas non teñen limitación en canto a extensión ou formato e poden conter calquera tipo de ilustración. Porén, poden servir tamén para tratar da estrutura habitual deste tipo de textos, así como os diferentes rexistros ou os tratamentos persoais.

Datos de contacto
É moi importante que cada carta (ou o sobre, se é o caso) inclúa os datos completos do neno ou nena: nome e apelidos, idade, enderezo (rúa ou lugar, número, piso, parroquia se cómpre, código postal e localidade), así como o número de teléfono. Todos os nenos e nenas que indiquen o enderezo correctamente (de xeito comprensible e identificable) recibirán nel unha nova carta resposta, esta vez dos personaxes do Nadal, na que se incidirá no obxectivo de que incorporen o seu herdo cultural, fundamentalmente a lingua galega, e se incluirá un pequeno agasallo.

Tamén é fundamental non esquecerse de indicar un número de teléfono da familia para que se poida contactar cos gañadores do concurso e convocalos á entrega dos premios, que coincidirá coa cabalgata do 5 de xaneiro.

As tres cartas gañadoras serán escollidas entre as escritas en galego, valorando a creatividade e a adecuación ao tema proposto. Asignarase cadanseu premio a tres tramos de idade (pequenos, medianos e maiores) e o seu contido, de carácter cultural, adaptarase a eles.

Caixas de correo e web
Cada centro escolar terá unha caixa de correo para depositar as cartas ata o día 18 decembro. Ademais, ata o 31 de decembro haberá outras caixas de correo nos seguintes puntos: Casa do Concello, Biblioteca Ánxel Casal, Centro Sociocultural e Xuvenil do Ensanche Centro Sociocultural das Fontiñas, Centro Sociocultural do Castiñeiriño, Centro Socioculturla de Santa Marta, Centro Sociocultural de Conxo, Centro Socioculturla de Vite, Local Sociocultural de Villestro, Local Sociocultural da Gracia, Local Sociocultural de Lavacolla e Local Sociocultural de Figueiras.

Toda esta información e a carta-invitación inicial estarán dispoñibles no enderezo: www.xianembaixador.com. Xián, o carteiro-embaixador que protagoniza a campaña de recollida das cartas, tamén está presente en Facebook para crear un espazo de comunicación sobre as cartas, mesmo de intercambio didáctico, ou simplemente unha vía máis para interactuar coa ilusión e a maxia.

Direccións relacionadas



Compartir: