Noticias

A Concellería de Deportes vén de reparar as pistas de tenis ao aire libre de San Caetano, na rúa Rodríguez de Viguri. O titular do Departamento, Adrián Varela, comprobou o estado no que quedou o recinto unha vez arranxado.

O concelleiro de Xuventude, Adrián Varela, presentou a programación para a mocidade compostelá do primeiro semestre do ano. As principais novidades son un curso de primeiros auxilios, un campamento multiaventura en Portugal e un descenso en BMX polo casco histórico.

O director-xerente do Auditorio de Galicia presentou un novo ciclo da Concellería de Cultura: Falabaratos. Monólogos, contos e outros shows. Dentro deste ciclo seis monologuistas de primeira liña ofrecerán os seus últimos espectáculos no Teatro Principal: David Amor, Quico Cadaval, Sergio Pazos, Leo Bassi, Luis Piedrahita e Godoy. As citas con estes humoristas serán de febreiro a xuño, sempre no Teatro Principal, ás 21:00 horas.

Os preparativos para a cita co fútbol internacional feminino que terá lugar o 15 de febreiro no Estadio Municipal de San Lázaro continúan a bo ritmo. O concelleiro de Deportes, Adrián Varela, desprazouse na tarde do luns á Delegación Local de Fútbol para asistir a unha xuntanza coa Comisión de Fútbol Feminino da Federación Galega de Fútbol, na que se avanzaron cuestión operativas e organizativas en relación ao encontro entre España e Austria.

Turismo de Santiago asistiu en Bruxelas ao seminario Russia, Intelligent Tourism, organizado pola Cámara de Comercio Ruso-Británica e a European Tour Operators Association (ETOA), que dende 1989 representa a turoperadores, axentes de viaxe, cadeas hoteleiras, oficinas de turismo e outros provedores turísticos fronte as autoridades políticas do continente.