PATRIMONIO
As cidades Patrimonio da Humanidade poñen en marcha o proxecto "Labirintos Líricos"
07/09/2016 O concelleiro Xan Duro participou hoxe en Madrid na presentación dun novo proxecto cultural impulsado polo grupo de Cidades Patrimonio da Humanidade, do que forma parte Santiago. Trátase de Labirintos Líricos, unha proposta que pon en marcha o grupo artístico BoaMistura, e que será unha intervención itinerante polas 15 cidades do grupo.
Labirintos Líricos busca mostrar a esencia e a identidade de cada unha das cidades Patrimonio da Humanidade a través da poesía, a arte e a cultura. Para iso, construiranse 15 prismas triangulares, un por cidade, nos que se escribirán unha frase, un verso, unha cita dun autor ou autora local, coa técnica do anaformismo, que se poderán ler só dende determinados puntos, creando labirintos e paisaxes distintas en cada cidade. Estas pezas colocaranse no espazo público e xuntas formarán un novo poema que falará sobre o presente e o pasado das cidades Patrimonio da Humanidade.