Noticias

A concelleira de Turismo de Santiago, Marta Lois, e a presidenta de Hostalería Compostela, Sara Santos, presentaron este martes en Madrid o concurso de tapas da capital de Galicia, Santiago(é)Tapas.

O Museo das Peregrinacións e de Santiago recibiu esta tarde a visita do ministro de Educación e Cultura, Íñigo Méndez de Vigo. O alcalde compostelán, Martiño Noriega, acompañou o ministro no seu percorrido, xunto co presidente da Xunta, Alberto Núñez Feijóo; o conselleiro de Cultura, Román Rodríguez; o secretario xeral de Cultura, Anxo Lorenzo; a directora de Turismo de Galicia, Nava Castro; e a xerente do Consorcio Belén Hernández, entre outras autoridades.

A Concellaría de Educación e Cidadanía colabora no VI Curso de formación sobre o patrimonio lúdico: Xogo, literatura oral e música, organizado pola Nova Escola Galega e a Asociación Galega do Xogo Popular e Tradicional. Serán dúas xornadas de relatorios e obradoiros, os días 13 e 14 de novembro, no Conservatorio Profesional de Música de Santiago de Compostela.

A Asociación do Traxe Galego, coa colaboración do Concello e do Centro Comercial Compostela convoca a XXI edición do Premio de Investigación Antón Fraguas sobre o Traxe Galego. Unha vez máis, premiaranse os mellores traballos descritivos e analíticos sobre esta indumentaria.

A Praza do Obradoiro acolleu unha concentración para condenar os últimos asasinatos machistas, que deixaron catro vítimas no Estado nos últimos días.

Este mércores celebrarase a proxección simultánea de Mediterranea, de Jonas Carpignano, en oito cidades europeas, con ocasión dos LUX Film Days. A película, un drama sobre os refuxiados sen trampa nin cartón, valeulle o premio ao mellor director novel no Festival Cinematográfico de Munich.

O alcalde de Santiago recibiu este martes a Xunta de Persoal do 061, que segue coas súas mobilizacións contra o traslado da súa central ao concello da Estrada. Martiño Noriega expresoulles o respaldo do Concello ás súas reclamacións, por canto a situación lle afecta a 250 familias da cidade.

No marco da 29ª edición do festival Cineuropa, este xoves, 12 de novembro, proxectarase o filme A woman of affairs (A muller lixeira), dirixido por Clarence Brown e con música de Carl Davis. Será ás 21:00 horas no Auditorio de Galicia. De maneira simultánea á proxección desta película muda, a Real Filharmonía de Galicia interpretará en directo a banda sonora orixinal, baixo a batuta do director francés Diego Masson.

Baixo o título Ramón Sánchez Estalote: memoria dun tempo, o Consorcio de Santiago promoveu unha exposición de imaxes do fotógrafo compostelán. A mostra estaba repartida entre a Casa do Cabido (na praza das Praterías), onde poderá visitarse ata este xoves; e o Museo do Pobo Galego, onde se clausurou a finais de setembro. Dende a súa inauguración, o 7 de xullo, visitaron ambas exposicións máis de 22.000 persoas.