PROMOCIÓN ECONÓMICA

Comezan os cursos de márketing dixital e desenvolvemento de videoxogos cofinanciados polo Concello de Santiago

03/03/2020 Cincuenta mozos/as, todos/as menores de 30 anos, participan nas dúas actividades formativas de márketing dixital e desenvolvemento de videoxogos programadas ao abeiro do convenio de colaboración entre o Concello de Santiago e a Cámara de Comercio compostelá, xestionado a través do Departamento de Promoción Económica.

En ambas actividades deseñouse unha estrutura común de programa formativo a modo de itinerarios, conformado por sesións grupais, titorías individualizadas e formación online complementaria. Ademais, cada un dos cursos reserva un paquete de entre 50 e 100 horas de acompañamento para o grupo, a distribuír entre os participantes máis avanzados na creación do seu negocio. Estas dúas actividades formativas impártense no Viveiro de Empresas de Costa Vella.

Márketing dixital e emprendemento
Esta tarde, ás 16:00 horas, comezará o Programa de Márketing Dixital e Emprendemento", que ten como obxectivo proporcionar unha visión global das distintas áreas funcionais da empresa, para poder determinar as oportunidades de mercado e desenvolver o plan de empresa ou plan de mellora, sempre coa axuda das ferramentas de xestión que favorecen a súa posta en marcha.

O programa axudará aos/ás participantes a definir a súa propia estratexia de comunicación nos novos medios (redes sociais, blogs, buscadores, etc.), e executar accións para mellorar a reputación e o posicionamento dos seus produtos ou servizos en internet. Finalizará o 17 de abril e nel inscribíronse 25 persoas. Está organizado pola Cámara de Comercio de Santiago, en colaboración coa Fundación Incyde, e conta co cofinanciamento do Concello de Santiago a través do Fondo Social Europeo.

Videoxogos e emprendemento
O Programa de Videoxogos e Emprendemento comezou onte pola tarde, con 25 participantes. Abrangue as principais disciplinas vencelladas coa creatividade dentro do mundo do videoxogo, xa que existe unha demanda de persoal cualificado para as áreas de 3D, produción, arte, deseño visual, deseño de personaxes e contornas, desenvolvemento visual, modelado, construción de contornas no motor, efectos visuais, etc.

Tanto este programa como o anterior están orientados a mozos e mozas menores de 30 anos inscritos/as no Sistema Nacional de Garantía Xuvenil. Neste caso está dirixido a profesionais e/ou emprendedores/as que desexen iniciarse no desenvolvemento de videoxogos, ou a persoas interesadas en ampliar e consolidar os seus coñecementos no campo da creatividade dixital. Finalizará o 17 de abril e enmárcase dentro do programa Operativo de Emprego Xuvenil cofinanciado polo Fondo Social Europeo para o período 2014-2020. Está organizado pola Cámara de Comercio de Santiago, en colaboración coa Fundación Incyde, e conta co cofinanciamento do Concello de Santiago a través do FSE.

Compartir: