PLENO

Ratificada polo Pleno a suspensión cautelar do procedemento de autorización de novos usos de aloxamento temporal

19/12/2019 O Pleno da Corporación aprobou este xoves a suspensión cautelar do procedemento de autorización de usos de aloxamento temporal. Esta medida cautelar adóptase mentres se tramita unha modificación do Plan Xeral de Ordenación Municipal (PXOM) para regular esta materia. A suspensión saíu adiante cos votos favorables de PSdeG-PSOE, Compostela Aberta e BNG e coa abstención do PP.

O acordo adoptado supón a suspensión por un ano do procedemento de autorización de novos usos de aloxamento temporal nos terreos situados entre a delimitación do ámbito do PE-1 (liña amarela) e o denominado perímetro da suspensión (liña azul), segundo se pode observar no plano anexo.

Dentro do ámbito delimitado, a suspensión afectará aos procedementos de outorgamento dos títulos habilitantes de natureza urbanística (licenza, comunicación previa ou declaración responsable) que supoñan a autorización dos seguintes usos ou actividades:

- Establecementos hoteleiros, nas súas distintas modalidades (hotel, pensión, pousada).
- Apartamentos e vivendas turísticas.
- Albergues turísticos (agás que se trate de albergues de peregrinos de titularidade pública).
- Vivendas de uso turístico, ou calquera outra modalidade que supoña a cesión da vivenda a terceiras persoas, mediante contraprestación económica, para estancias de curta duración (inferior a 30 anos consecutivos) ou con finalidade turística.
- Calquera outra forma de aloxamento temporal con finalidade turística, nos termos definidos na Lei de Turismo de Galicia.

A suspensión será efectiva a partir da súa publicación do Diario Oficial de Galicia (DOG) e extinguirase en todo caso no prazo dun ano, sen prexuízo da suspensión automática que poida derivarse do acordo de aprobación inicial da reforma.

Para falar desta cuestión interviu no Pleno María Dulcinea Aguín Pombo, da Asociación de Vivendas Turísticas de Galicia (Aviturga).

Estudo de detalle de parcela na Sionlla
Tamén en materia urbanística, aprobouse definitivamente por unanimidade o estudo de detalle da parcela I4a02 do parque empresarial da Sionlla.

Compartir: