XUNTA DE GOBERNO

Autorizado o novo protocolo entre Concello e Xunta para a mellora das entradas dos Camiños de Santiago

10/12/2019 A Xunta de Goberno, nunha sesión extraordinaria, aprobou a sinatura dun protocolo de colaboración entre a Consellería de Infraestruturas e Vivenda, a Consellería de Cultura e Turismo, a Axencia de Turismo de Galicia, a Axencia Galega de Infraestruturas e o Concello de Santiago, para a mellora e integración paisaxística das entradas dos Camiños de Santiago. Este novo protocolo derívase do asinado en febreiro de 2017 e supón modificar as obrigas a fin de optimizar as actuacións previstas.

En virtude do novo protocolo, a Xunta de Galicia, a través da Axencia Galega de Infraestruturas, en colaboración co resto de asinantes, e antes da finalización do ano 2020, estudará, proxectará e executará actuacións de obras nos seguintes ámbitos:
- Camiño Francés, entre a baixada do Monte do Gozo e a rúa de Miguel Ferro Caaveiro.
- Camiño Francés: fonte dos Concheiros e Concheiros, incluíndo a reordenación do cruce coa avenida de Lugo e actuacións complementarias na propia avenida de Lugo e actuacións complementarias na propia avenida de Lugo e en Rodríguez de Viguri, así como o aparcadoiro de Triacastela.
- Camiño Portugués: rúa da Escurridía, núcleo de Torrente, rúa da Benéfica de Conxo e praza de Conxo ata a SC-20.
- Camiño Inglés: tránsito a través do polígono do Tambre e fronte ao cemiterio e tanatorio de Boisaca.

A Xunta asume o financiamento dos contratos para redacción de documentos técnicos e de execución das obras, pero no caso da mellora do Camiño Francés ao seu paso por Concheiros, así como do estacionamento de Triacastela, será o Concello de Santiago o que licite e execute as obras. No caso de que esta execución non fose posible, revisarase o contido do protocolo para volver a un sistema de cofinanciamento. O resto de obrigas non se modifican.

A estimación económica do anterior protocolo é de 2.989.729,26 euros, mentres que o orzamento previsto no proxecto de reforma da rúa de Concheiros é duns 2.400.000 euros.

Conta xustificativa dos comedores escolares
Na mesma Xunta de Goberno deuse conta da aprobación da conta xustificativa do convenio de comedores escolares relativo ao período correspondente do 10 de setembro ao 30 de novembro de 2019, do curso escolar 2019-2020, por unha cantidade de 32.452,56 euros.

Documentos relacionados



Compartir: