ALCALDÍA

O alcalde condena os asasinatos de Valga (Pontevedra) e alenta a seguir denunciando a violencia machista

16/09/2019 O alcalde de Santiago, Xosé Sánchez Bugallo, comezou a súa rolda de prensa sobre a Xunta de Goberno deste luns lamentando e condenando os asasinatos acontecidos hoxe en Valga (Pontevedra), nos que tres mulleres perderon a vida a mans da ex parella dunha delas. Mañá martes, ás 12:00 horas, haberá un minuto de silencio na praza do Obradoiro en repulsa por estes tres asasinatos machistas.

Para Sánchez Bugallo, "resulta incomprensible un acontecemento deste calibre, que nos obriga a unha reflexión: temos que seguir loitando contra a violencia machista, temos que seguir denunciándoa, e non se pode ser tolerante con determinados discursos que empezan a proliferar na política española, discursos negacionistas que negan a existencia da violencia de xénero".

"A realidade é que non só existe, senón que se está resistindo a desaparecer –dixo- e a mellor proba é que, nos últimos 16 anos, máis de 1.000 mulleres morreron a mans da súa parella ou ex parella". Así, lamentou que o "certo descenso" que se produciu nos últimos anos "segue sendo excesivamente lento e con moitos pasos atrás".

Tal como anunciou, o Concello convocará un minuto de silencio mañá martes, ás 12:00 horas, na praza do Obradoiro, e sumarase aos actos que se convoquen en condena da violencia machista.

Compartir: