ALCALDÍA

Sánchez Bugallo reitera o obxectivo de iniciar a obra da EDAR da Silvouta en 2022 para preservar os fondos europeos

09/08/2019 O alcalde de Santiago, Xosé Sánchez Bugallo, cualificou a semana que remata como "positiva" para o conxunto da cidadanía, tanto pola reunión que mantivo esta semana en Madrid co secretario de Estado de Medio Ambiente, Hugo Morán, en relación á futura EDAR da Silvouta, como pola aprobación en Pleno dos orzamentos técnicos para 2019.

A reunión co secretario de Estado de Medio Ambiente é continuidade da rolda de encontros mantidos coa conselleira de Infraestruturas, Ethel Vázquez, e coa directora da ACUAES, Rosa Cobo. Sinalou que "perdemos oito anos", polo que o escenario no que se atopa o proxecto "non é o mellor posible". Neste sentido, indicou Sánchez Bugallo que "non estou en condicións de garantir que preservemos a totalidade da subvención concedida pola Unión Europea". Así, lembrou que eran 38,5 millóns no Plan FEDER 2007-2013, que logo se reduciron a 32 millóns no plan do 2014-2020.

O alcalde explicou que "empezando as obras no ano 2022, que é o obxectivo que temos marcado, poderemos aproveitar a parte proporcional da subvención correspondente aos traballos" que sexa posible executar no bienio 2022-2023. "É moi difícil –engadiu- que esa parte proporcional complete os 32 millóns de euros".

Todo isto, sinalou, contando que o procedemento de trámite medioambiental sexa abreviado, "incógnita que non podemos despexar ata dentro dun ano aproximadamente". Se fose o procedemento ordinario, o "escenario sería outro, porque non poderíamos empezar a obra antes do ano 2024 e estaríamos fora dos límites do actual plan de axudas". Aínda así, Sánchez Bugallo reiterou que "imos facer todos os esforzos que estean na nosa man para escoller a mellor solución técnica e para preservar os fondos europeos".

Orzamentos técnicos
Sobre os orzamentos aprobados este venres en Pleno, Sánchez Bugallo subliñou que, de non ter saído adiante, "quen máis perdería, en primeiro lugar, sería a cidadanía". Ademais, destacou que eses orzamentos permitirán cumprir con compromisos asinados polo anterior Executivo local, como o da pasarela da Intermodal ou as entradas dos Camiños de Santiago.

Ordenación do tráfico
A preguntas dos xornalistas sobre os atascos de tráfico destes últimos días en Compostela debido ao aumento de visitantes nos días de choiva, Sánchez Bugallo apuntou que se viron agravados porque "hai menos Policía Local e porque "non funciona a sinaléctica. Todas as pantallas de información e todas as pantallas conectadas cos aparcadoiros que funcionaban hai oito anos están desconectadas, porque non hai contratos de mantemento e deixaron de estar operativas". O alcalde indico que se "vai intentar darlle unha solución" a estes dous problemas.

Ante a posibilidade de que os atascos aumenten no Ano Santo, cando se incremente o fluxo turístico, o alcalde apostou por "habilitar aparcadoiros de borde, que para o 2021 van ser absolutamente prioritarios". Así, referiuse á necesidade de "rehabilitar e por en valor todas as áreas de estacionamento de borde, como San Lázaro ou Salgueiriños, e facer outras novas".

Compartir: