FESTAS

Segue aberta a inscrición para participar no desfile do martes de Entroido

17/02/2017 O Concello de Santiago mantén aberto o prazo de inscrición para participar no desfile do martes de Entroido, que se celebrará o próximo día 28. Como en anos anteriores, pódese participar nas modalidades de carroza, comparsa, grupo, parella e individual. As inscricións poden realizarse no Teatro Principal, en horario de mañá, ou a través do correo electrónico tprincipal@santiagodecompostela.gal.

Os participantes no desfile do Entroido deberán estar na estación de ferrocarril entre ás 15:30 e as 16:30 horas do martes 28 de febreiro, e o desfile partirá ás 17:30 horas. O percorrido será o habitual en anos anteriores: rúas Romero Donallo, Santiago de Chile, Frei Rosendo Salvado, praza Roxa, República do Salvador, Hórreo, Senra e avenida de Xoán Carlos I. Os premios entregaranse na Sala Capitol.

Na categoría de carrozas haberá un primeiro premio de 3.000 euros, un segundo de 2.000, e un terceiro premio de 1.000 euros. Na categoría de comparsas, os premios serán de 2.400, 2.000 e 1.000 euros; e na de grupos, haberá un primeiro premio de 800 euros, un segundo de 400 euros, e un terceiro premio de 200 euros. A mellor parella recibirá un premio de 400 euros; e para disfraces individuais tamén se establecen tres premios de 300, 300 e 100 euros.

Ademais, entregaranse premios especiais á mellor comparsa procedente das parroquias e barrios do Concello de Santiago, que serán incompatibles cos anteriores. Neste caso, haberá un primeiro premio de 1.200 euros, un segundo premio de 600 euros e un terceiro premio de 400 euros.

Direccións relacionadas



Compartir: