Festas do Apóstolo 2017

Rematan as festas do Apóstolo máis descentralizadas dos últimos anos cunha xornada que vén marcada pola música e os fogos fin de festa, tradicionalmente coñecidos como "fogos pequenos". Nesta ocasión, debido aos traballos que se están a realizar no patio oeste do Pazo de Raxoi, non se poderá realizar a recepción veciñal, tras a cal os/as asistentes presenciaban estes fogos fin de festa dende as terrazas, agora ocupadas polas obras.

Unha das citas máis tradicionais das festas do Apóstolo segue sendo o Día do Traxe Galego. A cidade volveu así vestirse de gala para vivir a XXXVIII edición deste evento, que pon en valor as nosas vestimentas tradicionais, contribuíndo así tamén á súa conservación.

As festas do Apóstolo van chegando ao seu remate cunha fin de semana ateigada de actividades e música. Haberá desfiles, automóbiles antigos e moitos e variados concertos.

Un grande espectáculo musical galego-cubano recordará o compositor José Castro González "Chané", no centenario do seu pasamento. O Alejandro Vargas Consort e a Camerata Egeria súmanse á voz de Rosa Cedrón para ofrecer unha revisión das obras deste compositor compostelán de fonda pegada na historia da música galega.

Ás portas da última fin de semana de festas do Apóstolo, chega un venres cargado de música e actividades culturais.

O Concello de Santiago lamenta comunicar a cancelación do concerto da cantante americana Macy Gray, programado para o venres 28 de xullo ás 22:30 horas dentro da programación das festas do Apóstolo.

Seguen as festas do Apóstolo cun xoves de actividades culturais, musicais e deportivas entre as que destacan as continuacións dos ciclos TerraZeando e Compostela é! Música.

As festas do Apóstolo celebraron este mércores o tradicional Día de Padrón en Santiago, no que as dúas vilas reforzan os seus fortes lazos de irmandade. Así sucede tamén, á inversa, na Pascua padronesa.

O alcalde, Martiño Noriega, presentou hoxe os próximos concertos que ofrecerá a Banda Municipal de Música no marco da programación do Apóstolo, e nos que a formación contará coa colaboración doutros grandes artistas e músicos do país. Así, a Banda estará acompañada mañá xoves na praza de Praterías polo cantautor Emilio Rúa, e o domingo 30 subirá ao escenario da Quintana con Treixadura e Cantigas e Agarimos.

Noite grande en Compostela coa celebración dos Fogos do Apóstolo, preludio do día grande das festas. A praza do Obradoiro e diversos puntos da cidade enchéronse un ano máis para presenciar o espectáculo audiovisual e pirotécnico que este ano realizou Acciona Producciones y Deseño, acompañado na parte pirotécnica por Ricardo Caballer.